中環出更：社交網潛水 夏千福蒲頭買水壺
做人最緊要安份守己，好似履新冇耐就對香港政制問題說三道四嘅美國駐港總領事夏千福，結果被外交部同本港官員鬧到冇晒面，近日仲「潛水」絕迹社交網站。不過，上周末下午大約三點鐘，卓妮有位老友就遇見夏千福又出動落區，同一位外籍朋友喺上環水坑口街一間知名嘅傳統雜貨舖買嘢，仲買咗個懷舊暖水壺添！
當日着住Polo恤嘅夏千福神態好輕鬆，期間同朋友有傾有講，睇嚟好享受行街樂趣。佢哋行到店舖門前，被門口掛滿嘅傳統家庭用品及雜貨深深吸引，於是入內仔細端詳，足足逗留大約二十分鐘，最後買咗一個舊式水銀膽暖水壺，盛惠二百九十八元。
夏千福一向鍾意打親民牌，經常喺領事館官方社交網站上載自己嘅遊蹤，但係自從被外交部駐港特派員宋哲公開警告後，佢近兩星期已喺網站上「失蹤」，最新一次係上個月廿七日去澳門舊基督教墳場拜祭首任駐港總領事Thomas Waldron。以前佢無論落區食雞批定歎茶都唔怕人知，但今次去上環行街就粒聲唔出，唔知係咪唔敢再咁高調呢？
應學雜貨店「安份守己」
講起上環呢間舊式雜貨舖已開咗近六十年，深受街坊歡迎，好多外國遊客亦慕名而來尋寶。佢哋主要售賣舊式家居日用品，簡單而實用嘅雜貨，貨品應有盡有。最得意嘅係擺放喺門口路邊嘅橙色塑膠豬仔錢罌，同埋懷舊公雞圖案餐具，途人未入舖頭已經夠晒吸引。
呢間舖依家已由第二代經營，喺租金昂貴、一味追求潮流尖端嘅香港，店舖仍然默默堅持，呢啲叫做「安份守己」囉，唔知夏千福學到嘢未呢？
卓妮