立法會剛復會，而各個事務委員會尋日亦舉行本年度首次會議，選舉委員會正、副主席及商討會期及議程。不過，有議員未開工就已經諗定放假，亦有議員開會時顧住傾偈，開會講咗啲咩都唔知，好似放完假未回魂咁。
發展事務委員會有成三十三名成員，要會期就晒每個人係冇可能嘅事，委員會原本打算最後一次會議定喺明年七月中旬，但議員田北辰（田二少）就話大會只係開到明年七月初，有乜理由大會開晒都仲要開委員會喎。陳偉業聽完後就立即扯火，話委員會一向都係開到七月底、八月初，大鬧話：「七月初放假？返去瞓啦！」
不過，掛住放假都唔及開緊會發白日夢咁離譜。話說政制事務委員會討論議程時，劉慧卿已提出要討論本港履行聯合國《兒童權利公約》嘅情況，委員會主席譚耀宗（譚Sir）亦定咗十一月中開會。點知隔咗冇耐，張超雄又舉手發言，話要定日期去討論卿姐之前所講嘅題目，搞到譚Sir忍唔住窒佢話︰「頭先你傾緊偈，我仲以為你可以一心二用添！」搞到張超雄面懵懵冇聲出。