政情：愛港之聲擬派人參選立會
愛港之聲最近棄用油麻地六百呎舊會址，「升呢」進駐新蒲崗逾千呎工廈單位，方便會員聚會，尋日就招呼會員老友出席開幕禮。召集人高達斌透露，有意開辦興趣班擴展愛港之聲版圖，甚至開班培訓政治新星，推舉佢哋參選立法會甚至特首添，皆因佢覺得依家有部分建制派未有盡力去支持政府，所以佢哋會視建制派為競爭對手，但就斷言唔會自己親身上陣參選喎。
新會址開幕 傅振中到賀
愛港之聲目前會員人數突破千人，但籌款數字依然得十幾萬元，只係「佔領中環」秘書處嘅十分之一。不過，做印刷生意嘅高達斌本身係會內大水喉，相信唔愁資金來源。講番尋日開幕禮，芸芸嘉賓當中，我哋發現愛港之聲前核心成員傅振中都有返「娘家」到賀，佢昔日同愛港之聲閃電「分手」，估唔到雙方不但冇擘面，反而再見亦是朋友，傅振中仲好識做咁帶咗兩支干邑同香檳去贈興，以行動粉碎不和傳聞。