政情：馮煒光做IC恐（火羅）爆
南區區議員馮煒光去年應徵副局長，但一直杳無音訊，點知近日突然傳佢有望做新聞統籌專員（IC），旋即被前黨友嘲笑同奚落，仲批死佢會成為特首嘅負累。不過，馮煒光繼續自我感覺良好，否認自己係負累之餘，仲為IC角色定位，自言必要時可以做類似美國白宮發言人角色。佢未上任就想將美國模式引入特首辦，如果畀佢做咗IC真係不敢想像。
前黨友譏做唔掂成負累
馮煒光旗下嘅公關公司喺剛過去嘅周日，負責藝術發展局藝術範疇代表提名推選活動，因選票印刷釘裝出錯鬧出風波。殊不知事隔多日後傳出，一直恨做官恨到發燒嘅馮煒光獲垂青做月薪達十八萬元嘅IC職位，呢個消息喺政圈廣泛流傳後引來好大回響，普遍反應係毀多於譽。特別係佢嘅前黨友，更不留情面踩到佢一毫子都唔值，質疑政府係咪無人才到呢個地步。
其中「卿姐」劉慧卿妙語連珠寸爆馮煒光並非新聞界出身，憂慮佢未必勝任呢個職位，單睇佢喺藝發局選舉安排混亂已經有辦睇。卿姐又批評，港府依家好多時都「甩轆」，好似教育局局長吳克儉等人，直言如果馮煒光又搞到「一鑊泡」，咁就真係死得。
特首辦尋日全日拒絕證實馮煒光做IC嘅傳聞，相反馮煒光就親自披甲上陣，接受多間電視台訪問反擊各方質疑，綜合有以下兩個訊息，首反駁公關出身唔適合擔任IC嘅說法，反稱會有增值效果，其次係IC必要時可以做發言人，好似白宮發言人咁，另外又可以選擇發放各項訊息嘅先後次序，事關呢啲全部都係公關工作。
接受訪問即「露底」出醜
不過，馮煒光講得極之興奮之際即時「露底」，當問及係咪接任IC時，佢講到明用三個字回應，點知脫口而出竟然係「不予置評」四個字，真係（火羅）爆收場。除咗IC人選突然有眉目，據聞發展局局長陳茂波亦有心儀副局長人選，有傳呢個人選有泛民主派背景。我哋曾先後向理大學者熊永達同前電台高層黃永查詢有無人搵佢哋做發展局副局長，前者話「從來無思考過呢個問題」，直言「搵到先講」，後者則連聲話「真係無」，又話自己無去面試，收到消息就話你知喎。