中環出更：培幼捐筆「諾」送暖
今日係國際女童日，國際培幼會（香港）為咗提供最基本嘅學習工具畀落後地區嘅女孩，將於本月廿一日至月底舉行「愛．女孩」「筆．生幸福」鉛筆捐贈活動，呼籲市民捐出鉛筆，以便喺聖誕節前轉贈畀內地及非洲加納嘅女孩，於佳節送上溫暖。尋日一眾「愛．女孩」大使包括英皇鐘錶珠寶主席楊諾思（Cindy）、前高官廖本懷太太毛妹及「蜘蛛女」鄭麗莎（Lisa）齊現身啟動禮，為落後地區嘅女孩打氣。
Cindy話，作為一位母親，好明白教育嘅重要性，所以好認同培幼會推動呢項活動。早前國際巨星畢彼特（Brad Pitt）與女友安祖蓮娜祖莉（Angelina Jolie）訪港，兩人趁颱風襲港期間幫襯中環英皇珠寶，結果畢佬豪花二百萬元買三隻名錶及一條鑽石頸鏈贈女友。講起件事，Cindy話事前唔知佢哋會去幫襯，覺得好榮幸。佢覺得買珠寶通常係女士自己話事，但係畢佬全程傍住女友揀選，認真溫馨體貼。
鄭麗莎準備好「造人」
上個月下嫁汪姓男友嘅Lisa笑臉迎人，問佢做咗幾個星期汪太嘅感覺如何？佢笑笑口話：「好開心，好興奮！」仲話人生進入另一階段，會告別運動員生涯，專心做一個稱職太太。佢依家除咗轉型做教練之外，亦修讀緊戲劇教育碩士課程。咁幾時生BB？Lisa笑稱，結婚前已做齊晒身體檢查，隨時準備造人喎！Lisa係連續六屆香港健體小姐冠軍，又曾經喺長洲搶包山比賽封后，體能咁fit，生多幾個都唔怕啦！
卓妮