立法會今日正式「開學」，議員們除咗準時開會，仲要留意吓民望，皆因過咗個暑假後，唔少議員民望好似溜滑梯咁急瀉，變晒「滿江紅」。
港大民意研究計劃尋日公布十大立法會議員評分，對比七月休會前，幾乎所有議員評分都下跌，其中跌得最多、傷得最重就係白鴒黨何俊仁（鐵頭仁），估計係同佢接受國泰航空款待豪遊法國，涉嫌利益衝突有關。
港大民調顯示，鐵頭仁跌咗六點一分，跌至佢自○六年首次上榜以來嘅新低。「長毛」梁國雄都唔好得去邊，跌咗五點四分。調查又發現，「逆水行舟、不進則退」呢個道理原來喺是次調查講唔通，因為新民黨葉劉淑儀評分無起跌，已經係咁多個議員當中最好嘅一位。立法會主席曾鈺成都跌咗一點九分，唔知同佢近日發表嘅「心魔論」有冇關呢？
港大又總結一年來議員嘅排名，發現議員評分同認知度未必係成正比嘅，雖然排第一係評分最高分嘅曾鈺成，但平均分數拍得住佢嘅工聯會陳婉嫻，就因為唔夠認知度，只係排第十位。相反低分嘅長毛，就有認知度搭夠，所以排名第五。
不過，上榜嘅十四名議員全部都係直選或超級區議會議員，傳統功能界別議員就真係要急起直追喇。