建制派同泛民主派喺各級選舉鬥到死去活來，點知未到選舉雙方已率先展開「筆戰」。其中民建聯批評立法會議員劉慧卿（卿姐）日前喺立法會小組會議上發言指區議員地位低、視野狹窄，係「貶低區議員，有欠公道」，並指卿姐「無理指摘」該黨係搞區議會比例代表制嘅「攔路虎」。卿姐尋日主動發出新聞稿嚴正澄清論據，反批民建聯散播不實言論，誤導公眾，對此不公道行為感到十分遺憾。
卿姐尋日發出新聞稿嚴正澄清，指自己當日發言係從政治制度出發，引述民建聯創黨主席曾鈺成近日嘅言論，指香港政黨尚不夠成熟，「民建聯也沒有花過任何心思培養管治人才」，由此建議當局須考慮改革區議會選舉制度，改用比例代表制選舉，讓選民可在較大嘅選區選出多名區議員，同時亦要增加區議員嘅權責，令議員俱備廣闊嘅視野。
此外，基於民建聯議員鍾樹根喺會上大力反對區會引入比例代表制，因此，卿姐就促請民建聯勿做反對比例代表制嘅「攔路虎」。