政情：監警會燙手 冇人敢接手
政府諮詢架構主席位接連換班，包括貿易發展局、市區重建局、以及尋日公布新主席人選嘅醫院管理局，但有關主席人選唔係違反擔任同一公職超過六年嘅「六六規定」，就係熟口熟面冇乜驚喜，反映政府缺乏人才情況嚴重。話口未完，獨立監察警方處理投訴委員會（監警會）主席翟紹唐嘅任期亦將於明年五月屆滿，據聞至今仍未有人敢應承接手監警會呢個燙手山芋。
○八年出任警監會（監警會前身）主席嘅翟紹唐，任內處事公正，又致力同警隊修補陷於僵局嘅關係，獲監警會委員讚佢「對事唔對人」，而會內討論氣氛亦相當理性，好似早前推翻警務處處長曾偉雄嘅「黑影論」，就成功確立監警會不偏不倚嘅公眾形象。可惜隨住翟紹唐六年任期屆滿在即，所以早前佢已表明會等監警會同最低工資委員會兩項公職任期屆滿後裸退，政府連留人都慳番。
警隊同市民間磨心
監警會主席作為警隊同市民之間嘅磨心，政府按慣例都會向外物色好似翟紹唐呢類資深大律師擔任，確保監警會嘅中立角色，奈何資深大狀人數唔多，曾有傳會接任嘅前副刑事檢控專員陸貽信，就因為過去嘅律政司工作同警隊關係太密切，加上佢已經身兼監警會委員，所以唔係合適人選。有消息人士透露，政府早前向兩位資深大狀招手都慘食檸檬，似乎呢個燙手山芋唔係人人敢接手。
工作繁重 委員亦嚇怕
政府除咗為物色監警會主席頭痕外，會內繁重工作量亦嚇怕唔少委員。據悉目前至少有兩個委員決定「唔續約」，包括陪老公退休嘅社聯行政總裁方敏生。委員會工作量日增，委員幾乎每星期都要開會，一年開八次大會，而每月車馬費亦只得二千元，要留人實在唔易。現時政府多個重要公職換屆，一係由舊人「多坐一會」，一係由朝見口晚見面嘅公職王繼任，睇嚟政府要物色主理政治敏感議題嘅監警會主席勢必一波三折。