中環出更：校友名人「科水」賀中大金禧
踏入金禧紀念嘅中文大學，前日喺灣仔會展舉行一場音樂籌款晚會，事前已張揚會請來八位殿堂級歌唱家大獻歌喉「吸水」，截至上月底已籌得逾千萬元。作為籌委會主席嘅和聲書院院監會主席梁鳳儀當晚好搶鏡，着住粉紅色拖尾吊帶裙出場，佢老公立法會前議員黃宜弘就揸住杯紅酒滿場飛招待賓客，十足擺酒請飲咁款。
黃宜弘為撐老婆，豪捐二百萬元畀和聲書院。梁鳳儀致詞時笑笑口話，表演嘅八位歌唱家身價不凡，校方畀唔起天價酬勞，不如請佢哋去該院新開張嘅上海菜館食飯喎。當晚會場中央起咗個圓形舞台，十足演唱會格局，中大校長沈祖堯喺台上一邊致詞一邊三百六十度自轉，佢話好唔慣，唔知有冇頭暈呢？
馬時亨身兼三間大學教授
身為校友嘅中華電力企業發展總裁莊偉茵同老公黃楚權恩愛到場，佢話自己鍾意聽徐小鳳唱歌，老公就愛聽粵曲，前晚嘅表演就滿足晒佢哋嘅要求喇。新任中大校董嘅立法會議員葛珮帆就同老公Henry十指緊扣現身，佢話今次係上任後首次出席嘅活動，心情特別興奮。
當晚前商務及經濟發展局局長馬時亨（肥亨）都在場，原來佢上月獲中大委任為中大工商管理學院教授，加埋香港大學同理工大學，佢已經係本港三間大學嘅教授。肥亨成晚笑笑口，皆因佢細女馬露玲幾日後就出嫁，但佢話早前坐完郵輪歐遊後肥咗五磅，要積極瘦身先至着得落套「踢死兔」喎！
卓妮同場仲見到石油界女強人鄭張永珍，佢話家翁正係中大前副校長鄭德坤，所以佢好支持中大發展。其實晚會仲有好多政商界名人出席，包括教育局前局長孫明揚夫婦、長實執行董事趙國雄、「極地探險家」李樂詩等，數都數唔晒，相信該書院嘅獎學金同學生交流嘅資金有着落喇。
卓妮