政情：學做茶花女 李蔚盈變香香公主
盛夏過後，就係採摘茉莉花茶嘅季節。福茗堂創辦人李少傑女兒李蔚盈（Olivia）上月親往中國茉莉花之鄉─福建嘅福鼎採茶。撞啱今年茉莉花豐收，漫山花海處處，濃郁花香撲鼻。Olivia即場學做茶花女，仲目睹整個造茶嘅過程。
置身福建茉莉花海
咪睇Olivia弱質纖纖，佢接掌家族茶葉生意五年，多次深入內地茶園採摘鐵觀音及龍井茶，但講到採茉莉花，仲係第一次。Olivia孭起背囊，戴上太陽帽，親嘗新鮮出爐茉莉花茶。原來八月三伏天，正係茉莉花香最濃時，茶農把握黃金時間摘花，製成頂級茉莉。採茶最佳時間係下晝三、四點，但最好製茶時段，卻喺入夜之後。Olivia晚上十一點幾與同事摸黑到茶師嘅工場，見證茉莉茶嘅造茶過程。
炮製頂級茉莉，需經過「七窨一提」，茶師將大白毫嘅幼嫩芽葉，配以茉莉鮮花，比例講究到極，要經過七次反覆窨花、風乾，以增加花香濃度。Olivia用心記低每個工序，眨眼睇到凌晨兩、三點。「通頂」製茶，Olivia高呼大開眼界。