政情：林建岳續封口 強拆薛覺先故居
香港旅遊發展局主席兼全國政協委員林建岳尋日出席「香港美酒佳餚巡禮」發布會，又祝酒又碰杯咁，不過當被問到佢旗下地產公司強拆廣州薛覺先故居，究竟復修成點？究竟點解反索償廣州市政府二點五億元？佢就即刻面都紅晒，不斷話「我諗我講咗好多次」，同場嘅助手即刻護主：「唔會答唔關旅遊嘅嘢。」
復修反索巨額賠償
今年六月，廣州市規劃局已經將事件定性為強拆，國土資源和房屋管理局亦確認開發商違法，今年九月，市規劃委員會召開會議，地產公司向政府提交嘅《檢討書》同《承諾書》曝光，就復建工程定出時間表，但同時披露公司擬就復建工程向市政府索取巨額賠償。不過，事隔近一個月，林建岳對於復修進度，就拒絕多講。