政情：科技通訊局見光死 ?
立法會功能界別嘅業界代表有時為爭取業界利益去到盡，本屬人之常情，不過一不小心誤判形勢就會「食詐胡」。講緊嘅係資訊科技界議員莫乃光（Charles），不久之前佢為爭取成立資訊科技及通訊局，同特首辦互指不是產生「小風波」，有心人拆解話嚴格嚟講兩者都無錯，只係Charles反應太快，將尚喺低調沙盤推演中嘅情節提早曝光，搞到政府無彎轉要硬接Charles呢招喎。
Charles早前喺港台英文節目中，突然開火話特首梁振英（CY）違背當年競選特首嘅承諾，至今仍然未設立資訊科技及通訊局，暗寸CY「走數」，CY同日透過特首辦發聲明，話係上年有人「拉布」先會令到政府架構重組被推倒，及至同日晚上Charles再發聲明回應，呢場「口水戰」一觸即發。
其實政府短期內都唔會再提架構重組方案，Charles突然出招爭取資訊科技及通訊局，莫非佢「收到風」提早做嘢諗住「成功爭取」攞分？原來確係有有心人就增設資訊科技及通訊局去搵各方持份者「摸底」，發現如將建議提交立法會，會得到足夠票數通過，最大隱憂反而係局長人選問題，有心人認為只要搵到喺業界具江湖地位嘅人肯做局長，而呢個人又係身家清白，唔會畀人搵到黑材料，其他都唔係大問題。
倘成功開局 打救蘇錦樑
如果資訊科技及通訊局一旦成功開設，間接亦可以打救商務及經濟發展局局長蘇錦樑，事關佢主責嘅政策範圍非常繁雜，倘有人同佢分擔咗科技同通訊一環，特別係極為惹火嘅免費電視發牌爭議亦會落入新任局長手中，相信一旦開設新政策局，佢都會樂見其成喎。
不過講到尾，資訊科技及通訊局個蛋糕有排都未焗得熟，而「成功爭取」最緊要就係時機，身為議會初哥嘅Charles首次「食詐胡」尚屬人之常情，究竟呢個意外情節係催化此事定係幫倒忙，大家就要拭目以待喇！