中環出更：巡舖睇裝修 陳正欣安樂晒
代理鐘錶品牌嘅前香港鐘表業總會主席兼百利建集團董事總經理陳正欣（Daniel），去年跨過界代理有四十年歷史嘅英國男裝品牌，結果愈做愈興起，決定開第二間分店。位於中環黃金地段嘅新店正進行裝修，Daniel好緊張，日前特登抽空去巡視，就算現場灰塵飛揚都冇有怕。
當日下午大約兩點半，打扮一絲不苟嘅Daniel喺置地廣場出現，佢落車後就直入商場地庫，途中巧遇一位西裝打扮嘅年輕人，兩人笑笑口指手畫腳，睇嚟好啱傾。告別友人後，Daniel行到一間用木板封住晒嘅舖位門口，自己郁手開門入去。
月底開幕賣西裝
Daniel喺入邊逗留大約五分鐘，卓妮趁佢出嚟打算離開時同佢傾兩句。Daniel話，新舖預定今個月底開幕，佢擔心裝修進度跟唔上，所以專程去睇吓，睇完之後個心安樂晒，因為進展良好。佢話去年十月首次引入呢個時裝品牌，首間分店位於銅鑼灣，受到眾多內地及香港一線男星愛戴。不過如果想消費者熟悉，免不了要開多幾間分店，所以佢咪打鐵趁熱，喺中環嘅品牌集中地開多第二間分店囉。
香港人鍾意扮靚，但係太多花臣嘅西裝洋服未必適合行政人員，所以Daniel穩紮穩打，睇中品牌嘅特色係款式及剪裁大方，重現英倫紳士風格，有一定嘅捧場客。Daniel眼光咁精準，咁下一步係做乜嘢生意呢？佢笑笑口話，嚟緊打算引入意大利鞋履品牌，預計首間店舖明年初開幕。
卓妮