政情：雙十慶祝 港府唔畀面
台北經濟文化辦事處尋日舉行雙十節慶祝活動，唔少同台灣友好嘅團體都派代表畀面出席，但負責對台事務嘅政制及內地事務局就唔多見有派代表現身喎。雙十節慶祝大會話晒都係台灣駐港半官方活動，台北經濟文化辦事處方面透露，有致函邀請港府多個部門出席，但港府會唔會畀面就唔到最後一刻都唔知。港府對台關係曖昧，至今未改。
作為主人家，台北經濟文化辦事處處長嚴重光整個朝早滿場飛招呼來賓，但港府代表就等極都冇人嚟。我哋問過政制及內地事務局，當局透露的確收過有關方面嘅邀請，但港府最終都決定唔派代表出席，更透露回歸以來都冇出席「雙十」慶祝活動嘅慣例。港府唔畀面，立法會就有「西環契仔」謝偉俊現身。真普選聯盟召集人鄭宇碩亦無懼政治敏感，以學者身份出席，他自言多年來同台灣方面都有學術交流。