政情：問「森」嗰句 港大可揀誰

「八一八事件」後不久，現任校長徐立之就宣布唔再續約，港大於是成立校長遴選委員會物色校長。金刀梁尋日大談過去兩年到底做咗啲乜，佢話委員會未開會前，已經向學生、校方同校友收集意見，之後遴選委員會經過五次大會，最終敲定五大準則，包括係學術根基及領導才能、個人品格及誠信、對港大未來方向有遠見、豐富管理經驗及有良好人際關係。

金刀梁認遴選準則遺漏

訂出呢五大條件後，金刀梁話已經開始全球招聘搵人，開頭收到五百幾封求職信，經獵頭公司同委員會篩選後，到尾段仲剩返幾十位「生還者」，然後遴選委員會逐一面試，仲試過越洋同申請者面試，最終篩剩馬斐森一人，所以只建議佢出任校長。

徐立之好有國際學術地位，但終未能跨過政治關，再揀校長，港大點解唔將熟悉亞洲同識中文放入篩選準則呢？金刀梁承認當初訂出五大條件時，的確係漏咗呢個方向，但佢堅稱港大作為國際級大學，無理由因為某啲條件而限制人才。其實金刀梁行走政壇幾十年，做過好多大大小小公職，年中閱人無數，點解佢事前未能評估到提名馬斐森做校長之後嘅社會反應？唔通有難言之隱？

其實港大校長未能請到更好嘅人選，又點關得晒金刀梁事吖，徐立之校長因為政治原因唔續約，就應該估到唔會再請到有更高學術地位嘅人嚟做校長，因為學術地位有幾崇高，講唔埋嚟到香港之後，隨時會因為一件事件而被打殘。香港嘅政治環境咁可怕，了解香港情況嘅學者都唔會嚟「送死」，諗通呢一點，就明白今次嘅招聘結果不知幾正常。叻人依家都唔敢入政府啦。