中環出更：試水肥佬 胡志偉偷雞渡維港
唔少政界名人都有報名參加第三屆維港渡海泳不限時嘅優悠組賽事，旨在落水一試身手，包括五位立法會議員同政制及內地事務局政治助理陳岳鵬（Ronald）。立法會議員胡志偉早前因為過唔到大會安排嘅試水，尋日最多只准游三百米，點知佢竟然「偷雞」唔聽大會工作人員指示上水結束賽事，一條氣游到尾，好彩最後無驚無險游到終點。
體文界馬逢國原本報名參加優悠組賽事，不過佢淨係游咗三百幾米就「上水」宣布投降，同金融界議員吳亮星乘坐大會船隻去終點。馬逢國解釋自己起步時唔識得「執生」，淨係識貼住其他泳手一齊游，點知游咗幾下就畀人打中佢左邊膊頭，搞到左手都出唔到力，於是決定放棄唔再游落去。Ronald就話游得非常輕鬆，最終由紡織及製衣業界鍾國斌（Felix）做咗「立法會飛魚」，以不足卅八分鐘游畢全程，比第二位嘅會計界梁繼昌（Kenneth）快兩分鐘有多。
卓妮