中環出更：幼園探孫蔡李惠莉好避忌
現今社會物質豐富，父母愛錫子女，好易造就「港孩」，更何況小朋友讀緊嗰間幼稚園係外公外婆開嘅？「玩具大王」蔡志明太太蔡李惠莉開幼稚園，細孫仔Amazon喺度讀緊兩歲班，但蔡太話佢對所有學生都會一視同仁，探孫嗰陣仲要好避忌盡量唔畀個孫見到佢，同老公都係喺門口偷偷哋望吓就行開。
與方劉小梅同月有喜事
身為保良局副主席嘅蔡太尋日出席沙田馬場保良局盃，同場遇到老友鬼鬼嘅前總理方劉小梅，即不停咬耳仔，原來方太下月初嫁女，咁啱蔡太同月娶新抱，大家互相祝賀一番。傳統話兩件喜事不宜相沖，但身為虔誠基督徒嘅方太話一於冇有怕，照去飲蔡太嗰餐。
新學年學位爭崩頭，蔡太話佢間幼稚園轉咗網上申請表，家長於門外排通宵嘅情況已大有改善，不過都仲有家長凌晨四點就排定頭位交表。佢認為，今年雙非學童數量多，大埔正校收到嘅申請表超額十倍，粉嶺分校仲有三分一係雙非學童嘅申請。佢話好彩政府去年及時推出「零雙非」措施，相信爭學位嘅情況會緩和。
警務處處長曾偉雄夫婦都有入場，卓妮即時問吓曾太有乜駐顏秘方，曾太笑謂：「個髮型呃到人啫！佢（指老公）畀好多嘢我食。」曾偉雄就自認唔「襟老」：「同身邊嗰個對比之下，咪顯得佢年輕囉！」真係幽默。保良局主席鄭錦鐘特別帶咗一批珍藏佳釀畀大家品嘗，太太關巧妍就將保良局嘅兩條會巾綁埋一條，當做腰帶裝飾，好有創意。
卓妮