政情：接掌教院 張仁良早睡
今年九月入主香港教育學院做校長嘅張仁良透露，日前剛好「滿月」，同一齊訪京嘅香港多名大學校長食紅雞蛋慶祝。佢依家住喺大埔郊區嘅教院校長宿舍，喺大自然寧靜嘅懷抱下，每晚十點半鐘就同周公見面。佢話，教院遠離大埔巿中心，想食碗雲吞麵都難，相比之前住喺火炭，鄰近公路，夜間飛車聲嘈到無覺好瞓，依家就可以早啲瞓，每朝六點半鐘起身耍太極，瞓得唔好就四點幾鐘起身喎！
港府屢派豬頭骨畀佢
點解咁寧靜都會瞓得唔好呢？佢除咗成日掛住為教院爭取「正名」做大學外，可能身為扶貧委員會成員，最近要四出介紹自己做主席嘅社會創新及創業發展基金，睇睇大家喺「衣、食、住、行」等方面有無創新思維扶貧同防貧。佢笑話，政府搵佢都係做棘手嘅工作，今次呢個基金係新概念，向商界同業界解釋至少兩次。
張仁良又憶述，○六年佢做「伙伴倡自強」社區協作計劃諮詢委員會主席時，當時無咩人知道咩係「社會企業」，要花費時間去宣傳同解釋，隨後緊接係做西九文化區管理局諮詢會主席，都係好棘手喎。佢講到咁樣，莫非埋怨政府專係搵佢去做埋啲豬頭骨工作？