中環出更：卿姐揼心口擺上枱 肥亨澄清
尋晚係民主黨成立十九周年黨慶，唔少政商界人士都有畀面出席，包括任內同該黨主席劉慧卿（卿姐）關係唔錯嘅商務及經濟發展局前局長馬時亨（肥亨）。不過身為主人家嘅卿姐就無錫住對方，一方面揶揄係「未來疑似特首」，搞到肥亨要急急澄清否認。卿姐玩完人之後又大揼肥亨心口，肥亨前後捐咗接近五十萬元。
拉坐主家席 捐咗五十萬
卿姐尋日開完立法會後，立即換咗條黑色晚裝長裙，化行個妝出席黨慶籌款晚宴。老友肥亨一到會場，卿姐就一個箭步上前拉咗佢去主家席，仲指定要佢坐喺自己隔離，大讚肥亨係未來疑似特首。肥亨就澄清，自己從來都冇諗過做特首，係啲人想像力豐富咁話。
到咗拍賣籌款環節，肥亨諗都唔諗就用咗八萬蚊，投得由前政務司司長唐英年捐出嘅一箱紅酒，之後佢再多次慷慨解囊，前後捐咗接近五十萬，證明佢無怪卿姐擺自己上枱。
卿姐為咗幫個黨籌款，可謂渾身解數，包括出賣自己後生做記者時嘅吊帶look報新聞片段，大玩「美女廚房」親手整醉雞拍賣等，最後籌得二百卅幾萬。不過全晚最搞笑嘅，係該黨前主席何俊仁攞白鴿黨收美國資助嘅傳聞嚟玩，拍廣告片自嘲「美元髮采……立即抹黑」。
卓妮