中環出更：賞「飾」羅啟妍 林鄭做埋老友

話說前日林鄭同羅啟妍一同獲邀擔任展覽主禮嘉賓，二人喺酒會碰面即熱情傾談，之後雙雙移步到展場內欣賞展品。林鄭行行吓見到羅啟妍設計嘅珠寶品牌展位，即主動行入去參觀，睇得津津有味，又不時同羅啟妍咬耳仔，莫非已經睇中咗在場嘅飾物？

珠寶作品幫襯逾十年

羅啟妍話，世界各國唔少政要都係佢嘅長期顧客，林鄭仲幫襯咗佢超過十年添，平均五次活動之中，都有兩次戴住佢嘅珠寶作品喎。至於林鄭最愛咩款式嘅珠寶呢？有冇打折畀佢？羅啟妍就唔肯透露，但佢話林鄭擁有其中一款飾物係價值近一萬元、由灰貝殼同珍珠製成嘅花形心口針，款式都幾大方o架。

參與展出嘅艾軒（中），與許劍龍（左）及季玉年（右）在畫作前合照。（蕭毅攝）	林鄭月娥喜愛佩戴嘅灰貝殼珍珠心口針。	今次展覽展出好多藝術家作品。

點解羅啟妍嘅設計深受各國政要愛戴？佢就解釋話，係因為佢設計嘅款式夠穩陣，點襯都唔會出事喎。講番個展覽，除咗羅啟妍參展外，仲有藝術家艾未未嘅哥哥艾軒展出畫作，同場仲見到季豐軒畫廊董事總經理季玉年及愛好藝術嘅民政事務局副局長許曉暉，而作為主人家嘅Fine Art Asia聯席主席及總監許劍龍就全程忙於招呼賓客。

卓妮