入夜如孤島 逸東「揾食難」
東涌入夜後儼如孤島，晚歸居民「冇啖好食」！有居民指逸東邨只設一個商場及一個街市供應全邨逾四萬人所需，商場、街市每日暫停營業後即「搵食艱難」。一直跟進問題的立法會議員指出，多年前已向政府爭取在區內設立類似「天秀墟」的熟食市集，以解決區內食肆不足以及小販擺賣問題，可惜部門一直置若罔聞，要求當局深入研究將小販轉化成墟市經營，以達致雙贏局面。
「以前有成廿檔小販，收夜班返到嚟想買咩食都有，唔使好似依家咁日日食杯麵！」家住逸東邨的阿權指邨內僅得一個商場及街市可供「搵食」，因此夜後出現的小販便吸引不少居民光顧，小販檔更儼如邨內「美食天堂」。但近日發現在食環署不斷掃蕩下，小販檔數目愈來愈少，阿權要求當局掃蕩小販的同時亦須向居民提供「搵食」地點，「街市一早就閂，商場亦唔會開得夜，其實政府會唔會諗吓喺商場以外地方開番啲食肆畀我哋？」
記者實地了解期間，發現夜後的逸東商場已告落閘，邨內並無食肆可供居民醫肚，但有六檔小販卻於八時左右在一條小巷內擺賣，街頭小食如串燒、碗仔翅、煎餃、糖水等應有盡有。雖然小販檔位置隱蔽，但仍有不少「識窿路」的街坊前往購買，當中以即叫即燒的串燒檔最為熱門。
「應該諗下本土夜市」
「我哋曾經做過問卷調查，好多街坊都贊成小販檔繼續經營，只要唔影響環境衞生就得，逸東邨小販檔咁耐以嚟都冇收過食物安全投訴，我哋都希望小販檔可以發展成墟市、夜市，滿足居民需要。」立法會議員兼當區區議員鄧家彪認為政府現有小販政策有過時之嫌，應考慮地方需要而發牌，而非一味取締，「好似天秀墟咁，政府係咪應該諗吓喺東涌呢一類偏遠地區發展本土夜市，透過發牌保證食物安全，又可以令居民有啖好食！」
領匯發言人表示，為解決小販問題，商場辦事處除放置圍欄外，亦會加強晚間保安巡邏，在有需要時會勸喻有關人士即時離開。至於被問及會否改以其他方式妥善管理小販檔問題，發言人則未有回應。
記者：黃芷君、陳倩儀