前特首曾蔭權爵士表面上係一個虔誠嘅天主教徒，其實靈魂早就賣咗畀魔鬼，如果唔係，都唔會搞到一身貪腐，身敗名裂啦。令人氣憤嘅係，貪曾渾身腐臭，竟然有班政客甘之如飴，仲為佢保駕護航添，唔怪得佢有恃無恐，至今逍遙法外啦！
呢班保貪政客係邊個？咪就係人稱「禮義廉」嘅民建聯囉。係咁嘅，貪曾醜上加醜，繼被踢爆貪遍省港澳被廉署調查後，最近又被揭發為乞見教宗而同意大利政要進行魔鬼交易，涉嫌干預司法，甚至離譜到連前朝三名司長亦捲入其中添。正如有人話齋，貪曾係為一己之私，不惜出賣香港法治同司法獨立。所以咯喎，有議員考慮請出號稱「尚方寶劍」嘅權力及特權法調查事件，哈，點知民建聯議員葉國謙唔支持不特止，仲幫貪曾幫到出晒面，你話佢係咪十足助紂為虐嘅屎忽鬼吖？
葉國謙點樣護貪呢？佢話喎，唔可以單憑傳聞就決定引用特權法，又唔認為事件有問題喎。乜話？貪曾捲入魔鬼交易係傳聞？干預司法嘅做法冇問題？保貪黨議員係咪盲目護貪得太耐，搞到雙眼盲咗呀，全港傳媒雞乸咁大隻字報道呢單事件，內容全部基於意大利政要嘅庭上供詞，白紙黑字，有根有據，點會係傳聞呀。民建聯想放生貪曾咪大大方方講出嚟囉，唔好九唔搭八，語無倫次，侮辱自己人格唔緊要，唔好侮辱市民智慧吖嘛！
功夫茶諗極都唔明，民建聯點解咁犯賤，係都攬住貪曾呢件政治負資產。呢，舊年本報揭發貪曾連串貪腐醜聞，立法會打算提出彈劾及不信任動議，逼貪曾落台，又係多得民建聯等保貪黨從中作梗，最終功敗垂成。民建聯是非不分，以醜為美，堅定與民為敵，與貪同腐，市民不得不懷疑，佢哋同貪曾亦有魔鬼交易囉。
咁講啦，事實已經好明顯，將靈魂出賣畀魔鬼嘅，唔止貪曾，仲有民建聯。只有喪失靈魂嘅政黨，先至會視保護貪官為己任嘅啫。功夫茶想提醒保貪黨、護腐黨，你哋倒行逆施保貪蔭權，唔止係「禮義廉」無恥，更加係豬頭炳無腦。唔係咩，一來中央成日話防範外國勢力，而民建聯卻瞓身保護一個英國爵士，咪即係同中央唱對台？二來咯喎，中共第五代上台後厲行反腐，老虎蒼蠅一齊打，民建聯作為親中嫡系，居然公然包庇貪曾呢隻貪腐大老虎，如果畀外界誤以為係北京嘅意思，咁咪陷阿爺於不義？擦鞋都睇時勢吖，錯判形勢站錯隊，小心自食惡果吖！
一句講晒，反貪潮流不可擋，保貪逆流自取亡。市民嘅眼睛係雪亮嘅，貪曾一身貪腐固然法網難逃，保貪黨狼狽為奸一樣遭唾棄，如果唔回頭是岸，等住陪貪曾一齊釘在歷史嘅恥辱柱上啦，叮！