政情：湯恩佳：反孔廟者左過毛澤東
孔教學院獲黃大仙區議會舉腳支持，喺鑽石山大磡村舊址興建本港首間孔廟，有望成為區內新地標之餘，更同區內現有嘅佛教志蓮淨苑同道教黃大仙祠，開創儒釋道三教同區鼎立嘅先河。不過，坊間有意見認為八千平方米咁大笪地，應該地盡其用起樓解決住屋問題好過，孔教學院院長湯恩佳對此就有啲牢騷不吐不快喇！
兩父女齊護航
湯恩佳日前以孔教代表身分，出席宗教界十．一酒會時大吐苦水，話大磡村舊址笪地皮區區嗰八千平方米，唔算好大，相比同區嘅黃大仙祠仲大啦，又話香港咁多道觀、教堂，但偏偏一間孔廟都冇，喺香港起一間都唔係好過分嘅，更 指反對建孔廟嘅人即係反對孔子，呢種想法「仲左過毛澤東呀！」
偕湯恩佳同場嘅仲有佢嘅千金、身兼學院永遠名譽會長嘅大律師湯棋淯（Judy），Judy透露因為工作關係不時要上兒童法庭，但慨嘆時下年輕人質素已經「不可同日而語」，好似佢見過有啲當事人開門唔係用手、而係用腳踢，坦言希望透過建孔廟，向現代人宣揚孔子提倡嘅拚搏、和諧同互相尊重精神。