政情：馮康退休過檔中大？
醫院管理局（醫管局）新界東聯網今年是非多多，當中以中文大學醫學院心臟內科教授余卓文封刀事件鬧得滿城風雨，令貴為「元老級」嘅新界東聯網總監馮康都被迫喺風雨飄搖之下榮休。有傳馮康過檔中大擔任公共衞生學院教授，甚至會做中大私家醫院院長，但無論佢去邊都好，相信都冇醫管局咁多是非，天氣轉陰為晴。
拒回應余卓文事件
馮康臨近退休先至爆出心臟內科醫生集體投訴余卓文事件，威爾斯親王醫院仲指令余卓文暫停做所有通波仔手術，事件愈鬧愈大。原本唔想出來解畫嘅馮康，都忍唔住要喺大氣電波同余卓文隔空罵戰成個星期，疲態盡現。
尋日馮康喺退休前最後一次出席聯網工作計劃簡介會，期間曾多次被記者問到封刀事件嘅調查進度，又被問到事件會唔會令佢退休前留低一個污點，但佢都一一笑而不答：「暫時唔方便講，但事件唔會影響醫院嘅通波仔服務。」
或任中大私院院長
馮康今日起就開始退休前休假，有傳佢退休之後會過檔中大擔任公共衞生學院教授，甚至會做中大私家醫院院長，佢就陰陰嘴笑話，未確定嘅嘢唔講住，但佢一提起教書就好興奮話：「我依家都會去講書，你有冇興趣去聽一堂？」睇嚟佢退休後去執教鞭都係唔錯嘅選擇喎！
撇除轉工傳聞，其實馮康嘅計劃都有好多，首先想放大假旅行同休息，期間仲要開始練跑備戰明年初舉行嘅馬拉松賽事，當然係唔少得拉佢最愛嘅二胡啦！為咗送別馮康，醫院公關同記者們就向佢送上一幅「Ｑ版馮康」拉二胡嘅漫畫，令到近月愁眉不展嘅馮康終於都笑返晒，仲話可以將呢個「Q版馮康」擺上社交網站做Profile picture（個人照片）添！