香港每日製造九千一百公噸都市固體廢物，用以處理垃圾嘅堆填區又日漸飽和，點算好呢？環境局局長黃錦星本來心口寫個勇字，一意孤行話要擴建三個堆填區，包括將軍澳、屯門以及打鼓嶺。點不知雙拳難敵萬手，將軍澳居民一聽見咁嘅噩耗，馬上採取激烈行動強烈反對，又集體絕食，又剃頭抗議。卒之咯喎，唔止將軍澳堆填區擴建計劃鳴金收兵，連屯門同打鼓嶺都原封不動。
黃局長屢敗，官老爺屢戰。可持續發展委員會公布垃圾徵費第二階段諮詢文件，針對收費方式同收費水平等等議題廣集市民意見。
諮詢文件提出幾個唔同嘅收費水平，以三人家庭為例，每月收費介乎三十元至六十元，政府可按每幢樓宇每月產生嘅垃圾量計算實際費用，再向各住戶平均攤分，或者要求市民全面轉用並且購買政府指定嘅垃圾袋，如果使用其他膠袋丟垃圾，可能構成非法棄置而被罰款。文件又建議，減少街道垃圾桶嘅數量，另外加裝閉路電視，防止有人非法棄置。黃錦星就話嘞，政府對垃圾徵費冇預設立場，可持續發展委員會聽取市民意見之後，會將有關結果提交環境局審議。
功夫茶相信市民基本上唔反對垃圾徵費，正如環保團體曾經做過調查，六成半市民支持垃圾按量收費，較今年初增加十三個百分點，反對垃圾徵費有百分之二十五，減少十個百分點。調查結論係，實施垃圾按量收費逐漸成為主流意見。
垃圾徵費即係污者自付，理論上係可行嘅，因為污者唔想畀咁多錢吖嘛，垃圾數量就可以大幅減少。以台北為例吖，自從實施資源回收、強制分類、垃圾不落地以及隨袋收費等等政策之後，台北垃圾棄置量由每人每日一點一二公斤減至零點三九公斤，減幅百分之六十五。至於市民嘅垃圾費負擔，由每月大約港幣三十六元減至十三元。
之不過問題係，人哋台北係推出一籃子配套措施，香港呢？唔好意思，資源回收似有還無，強制分類影都未見。唔好唔記得喎，台北家陣嘅街道甚少見到垃圾桶，原因係避免民眾偷雞唔畀錢將廢物胡亂棄置，所以垃圾桶唔會通街擺。香港有唔少人患上一種怪病，叫做發錢寒症候群，萬一有人為咗每月慳幾十蚊而亂丟垃圾，甚至冷血到隨手一掟高空擲物，咁就死得嘞！
即係咁，垃圾徵費不妨諮詢，不過環境局唔可以繼續淪為官場垃圾，配套措施不能太廢柴，否則監管失敗之下，話唔定通街通巷污糟邋遢！