政情：大劉語無倫次？ 一時話嚇大 一時話被姦

大劉自從官司纏身後一直三緘其口，但近日就一反常態向個別傳媒爆大鑊，但講嘢十足斷橛禾蟲，有一句無一句，唔知想帶出啲咩訊息。及至剛過去嘅周日，大劉再現身富豪飯堂，但今次收晒口無出聲，反而臨離開時唔留神幾乎仆親，直到尋日最新「驚喜」反而係佢早前同個別傳媒嘅對談內容曝光。

其實大部分對談內容都係老調重彈，包括大劉話想開拍佢經歷嘅《張子強與大劉》、「預咗畀人喺街下亂刀斬死，或者亂槍殺死」等，較為新鮮嘅內容係佢自言四歲開始已經「嚇大」，「否則心臟病死了」，其後又左一句唔怕、唔驚死，死有輕於鴻毛、重於泰山，又話「曼德拉都坐咗廿七年政治監，我問心無愧」。

「要扮高潮先可以無事」

不過，大劉口講唔怕死，但同一時間又喊驚連連。佢宣稱起初不想投資，畀咗大筆錢人哋都要「撕佢票」，又自稱被逼到走投無路猶如被人強姦，「你一定要扮高潮，先可以無事走得，如果你叫救命，就殺你全家，誅你九族」，形容呢個係「白色恐怖」喎。

聞「被人搶地」　即打噴嚏

大劉講到天花亂墜，都唔知信唔信佢好，最為一致嘅舉動係幾乎日日都精神奕奕現身富豪飯堂。話說佢尋日中午約十二時半，由司機接載到飯堂落車，然後匆匆進入酒家，直至下午一時四十五分先離開。當問及「劉生你係咪被人搶地皮」，大劉聞言一語不發，仲打咗個噴嚏添，唔知呢個噴嚏又暗示啲乜嘢，透露乜嘢玄機呢？

不過，講到底如果大劉真係有咁多「內幕」要爆，理應到澳門應訊一五一十交代清楚至啱，否則縮埋喺香港翻來覆去，鍾意講就講，唔鍾意講就唔講，咁又有乜用處呢？