政情：中環出更：人大前輩多 顏寶鈴後生咗
飛達帽業副主席顏寶鈴去年首次參選港區全國人大代表即當選，呢位人大「新丁」唔經唔覺已經上任大半年，造帽做到笠多頂人大帽，會唔會好難兼顧？顏寶鈴笑言，公司業務上晒軌道，唔再需要佢事事親力親為，當選人大反而令佢感覺年輕咗喎，唔通做人大都係女人青春嘅秘密？
顏寶鈴尋日同傳媒茶敍時講起人大工作，佢自言平日做老闆要一夫當關，人人尊稱佢做「寶鈴姐」兼鬧人唔使本，但當選人大後，發現自己喺男人佔多數嘅人大入面只算小眾，加上年紀喺人大之中亦比較輕，唔少前輩都好樂意提點佢，令佢當堂覺得自己後生咗，感覺自己變咗「寶鈴妹」！不過，佢強調做人大最緊要係開會前做足功課，所以即使做「新丁」都冇有怕。
講起佢嘅帽業生意，佢每個月都要兩次飛去孟加拉監督當地廠房，期間留宿酒店。不過，佢大呻當地附近得兩間高檔酒店，房價每晚四百美元（約港幣三千一百元）都幾唔划算喎。
卓妮