政情：中環出更：三宗教代表唔騷佔中
學者發起嘅「佔領中環」行動（佔中）煲咗咁耐，佔中三子近來積極向宗教團體同少數族裔招手，想透過參與商討日了解更多香港民主進程，可惜除咗天主教同基督教表過態，其他宗教似乎冇乜聲氣。卓妮日前趁多個宗教團體代表出席宗教界十．一酒會，問吓佢哋嘅意見，發現大家對佔中嘅態度都比較遲疑，同佔中三子唔係咁啱嘴形。
身兼伊斯蘭教代表同選舉委員會委員嘅脫瑞康透露，宗教團體之間並無討論過佔中，又話雖然伊斯蘭教一向予人感覺比其他宗教激進，但其實亞洲區嘅伊斯蘭教徒普遍溫和得多，香港有成六萬幾個居港伊斯蘭教徒話多唔多，而佢個人就唔鼓勵教徒參與佔中喇。
道教聯合會主席梁德華就話，依家政改討論眾說紛紜，應該學老子話齋：「不敢為天下先」，即係先聽其他人意見再確立自己立場，三思後先至發聲。
基督教代表袁天佑牧師都期望二○一七年有真普選，確保唔同人士都可以參選，亦相信港人有智慧選擇適合嘅人做特首。不過，袁牧師話佢哋冇仔細討論過佔中，亦唔希望佔中出現，即使有基督教代表支持佔中，都係有關代表嘅個人意見喎！
佛教覺光法師 未有回應
三大宗教代表都唔多睬佔中，但亦不約而同透露政府當局仲未邀請佢哋就政改表達意見，睇嚟政府要快手諮詢啲宗教代表至得喇！至於佛教又點睇佔中呢？香港佛教聯合會會長覺光法師就未有回應任何問題，全程要助手攙扶，而上台致詞時亦有幾聲咳，大師認真要保重身體。
卓妮