立法會下月先至復會，但一班議員已急不及待提動議，爭取喺復會後首個會議曝光。不過，爭取還爭取，始終都係要抽籤決定。工程界盧偉國（WK）同建築、測量及都市規劃界謝偉銓（Tony）就先拔頭籌，分別動議辯論基建規劃及住屋問題，兩項都係老掉牙嘅議題，估唔到立法會靜咗咁耐，一開波就由兩個悶人加兩個沉悶議題，唔通佢哋體恤一眾議員同事外遊會攰得滯，等大家開會可以瞓吓覺？
WK同Tony呢對「建築界雙雄」不約而同抽中喺下個月九日、即立法會復會後首次會議提出議案辯論。前者議題係「制訂長遠基建規劃、推動可持續發展」，後者就係「制訂住屋開支上限及人均居住面積標準」。呢兩個議題過往都有相關嘅討論，唔算有新意。
反而一啲會有機會激起火花嘅議題如議員謝偉俊提出嘅「檢討廉政專員委任、問責及廉政公署甄選調查案件透明度」及黃毓民提出嘅「對立法會主席投不信任票」，就唔知幾時先抽得中喇。
過往立法會暑假後復會，就係特首宣讀施政報告嘅時候，但今屆政府就改為一月先至發表施政報告，睇嚟班議員都係要打吓口水戰先至得喇。