政情：啟剛爆囝囝好有「晶」力
上月廿七日榮升爸爸嘅香港青年聯會主席霍啟剛，上周六出席一個晚宴活動時笑笑口話，雖然囝囝仲未滿月，但雙腿好好力，經常用力係咁踢，似想轉身咁款，實情係遺傳到奧運跳水冠軍太太郭晶晶嘅好腿力。話時話，BB通常三、四個月至識轉身，呢位霍家第四代若然真係遺傳到晶晶喺空中旋轉翻騰嘅真功夫，第日會唔會又係一位出色運動員呢？
仲等緊阿爺改中文名
啟剛講起BB時掩不住喜悅，笑容滿面，佢話BB仲未戒夜奶，親自餵母乳嘅晶晶晚晚都要起身餵奶，佢幫唔上忙，惟有幫手換尿片參與吓。咁阿B改咗中文名未呢？啟剛語帶些少「投訴」話：「未呀！要等阿爺（霍震霆）改，但係佢好忙！」
細看之下，啟剛身形飽滿不少，問佢係咪幫手食晶晶坐月嘅補品？點知佢話，醫生話晶晶係剖腹產子，唔使食太多藥材補品。加上媽媽朱玲玲係新潮奶奶，唔識坐月進補呢一套，所以屋企冇乜補品喎！不過，佢都自認依家同最fit時相比，確係肥咗。