政情：抑樓價怪招 雷鼎鳴：放核彈
科技大學經濟學系主任雷鼎鳴最近經常上電台同出席論壇，狠批「佔領中環」行動，包括指佔中會令香港經濟每日損失十幾億元，又叫人改為「佔領中南海」或者「佔領維園」，總之就唔好「佔領中環」阻人返工做生意，非常勇猛。不過，佢對近日社會議論紛紛嘅樓市「辣招」極力反對，直斥辣招對樓市弊多於利，反建議其他更辣招數壓樓價。
增土地供應先係正途
雷鼎鳴早前出席一個樓市論壇時，自言一向唔贊成政府推出有關辣招，因為有關招數雖然一方面可壓抑部分市民買樓嘅需求，同時亦會影響業主放盤賣樓嘅意欲，減少市場供應，未必可降低樓價，強調盡快增加土地同房屋供應先係正途。不過，佢承認依家政府咁弱勢，好難喺短期內落實增加供應。
咁作為經濟學家嘅佢，有乜高招令樓價迅速下跌呢？雷鼎鳴就講笑咁話，原來以投資凶宅聞名嘅伍冠流係佢中學同學，指凶宅樓價一般會平三、四成，「有人吊頸即刻平晒，不過無人會故意咁做」。另一方法係放核彈，附近樓宇全部受輻射影響，包你樓價跌到阿媽都唔認得！聽落佢真係天馬行空。