政情：親中派怒插吳得掂

第一宗：批評《中國模式》

新政府去年七月上場至今醜聞風波不絕，其中吳得掂甫上場未坐暖局長個位就連番中箭，有關注教育嘅親中團體事隔多時仍要力數吳得掂三宗罪，首宗罪係表態批評《中國模式國情專題教學手冊》（《中國模式》）內容偏頗。有親中人士形容，吳得掂此舉係越俎代庖，認為《中國模式》一事理應交由課程發展議會跟進，但吳得掂卻親自上陣以局長身份定調有關內容偏頗，自然被反對者食住上批評，要求收回有關教材嘅聲音由此而生。

第二宗：接見學民思潮

第二條罪亦同國教有關，就係吳得掂決定與當時未冒起、由中學生為骨幹嘅學民思潮成員會面，有人憶述前教育局局長孫明揚任內一直懶處理學民思潮等新生組織，相反吳得掂上任之初未摸清形勢，就自動「送上門」應約學民思潮成員會面，結果學民思潮因閉門會議離場一炮而紅，此後亦成為反國教洗腦嘅中堅分子，難怪有人慨嘆早知今日何必當切，無催生學民思潮，或者國教科嘅命運會截然不同。

第三宗：「不秋後算帳論」

至於第三宗罪就係吳得掂回應佔領中環行動（佔中）嘅言論，即係佢就教師應否帶同學生參與佔中發表嘅「不秋後算帳論」，呢番言論當然被親中團體狠批到體無完膚，事後港府高層同吳得掂本人都要補鑊。至於展望未來，提供切實可行嘅十五年免費教育、中史科應否為必修科等議題繼續係教育界焦點，吳得掂如果想避免重蹈覆轍，就認真要諗套萬全應對策略先得喇！

另外，吳得掂今日會啟程到前往上海、北京同天津進行交流活動，其中喺北京行程有逾百名教育界同工加入，唔知佢會否趁機同大家拉近距離呢？