颱風天兔雖然號稱係屬於怪獸級別，直徑一千公里，風速二百公里，嚇到一個二個三魂唔見七魄，不過到頭來破壞力唔算太大。天兔襲港期間，風高浪急固然係有，不過市面上相對平靜，比較緊張嘅只不過係精明師奶衝去超級市場掃貨，尤其係用以防範玻璃窗不堪一擊嘅強力膠布被搶購一空。
其實講真，香港確係一塊有運行嘅福地，平時已經冇乜天災，就算颱風砰砰嘭嘭打到嚟，好多時兵臨城下都會急轉彎。就以今次天兔為例吖，移動路線本來直撲而來，去到最後關頭從香港背後掠過，喺預計較東嘅位置登陸汕尾，然後再向西吹。亦即係話，天兔過門而不入，冇正面蹂躪呢一個國際大都會。
當然啦，每一次打風都會惹來怨聲載道，主要嘅爭論焦點係幾時掛八號波以及幾時改三號波，原因係打工仔希望偷得浮生半日閒，寧願八號風球高高掛，等佢哋能夠享受從天而降嘅打風假期。
既然怪獸級別嘅超強颱風都冇令到香港變得滿目瘡痍，功夫茶不期然諗起兩句諺語：天作孽猶可違，自作孽不可活。典出《尚書》嘅諺語意思係話，面對自然界帶畀凡間嘅災害，人類仲可以逃避而生存，不過一旦遇到人類自己一手造成嘅罪孽，大禍臨頭往往無法死裏逃生。
呢嗱嗱嗱，你都咪話香港人唔係自作孽，自從九七回歸十六年以來，基本上就係年年月月不斷作孽。最慘痛嘅例子莫過於○三年爆發沙士瘟疫，開始嘅時候或者可以勉強叫做天作孽，不過去到後來就變成手忙腳亂嘅自作孽，特區政府嘅防疫措施亂七八糟，卒之香港嘅死亡率冠絕全球，總共二百九十九人唔係好壯烈咁樣犧牲咗。自作孽，不可活，真係唔到你唔贊成o架。
病樹傾倒殺人係天災咩？唐樓坍塌殺人係天災咩？劏房火燭殺人係天災咩？唔好玩啦，即使有三分係天災，仲有七分係人禍呀，只有一個管理不善嘅社會先至有咁多死人冧樓。
仲有喎，回歸以來百廢未舉，每一項發展大計幾乎都係拖拖拉拉，一方面固然係官老爺無能啦，另方面又係香港人日拗夜拗爭論不休嘅後果。喂，家陣嘅政治氣氛好鬼死古怪o架，你話一，必然有人話二，你向東，肯定有人向西。現屆政府話就話政策成熟一項推一項，實際上係每推一項冧一項，跪低一項，發展嘅後腿受到力大無窮嘅拉扯。
即係咁，天兔來襲猶可違，港人作孽不可活。好心大權在握嘅官老爺洗心革面，真真正正做到強勢領導，適度有為，否則香港再過十六年都係原地踏步o架咋！