嚟緊十‧一長假期，大班內地人又來港旅遊兼掃貨。去年今日奶粉仲係佢哋嘅必掃品，但自從今年三月限奶令推出後，已經再無掃奶粉呢支歌仔唱。唔知係咪內地傳媒知道內地人同水貨客憎限奶令呢條惡法憎到入骨，內地傳媒為求收視，竟然將日前食物及衞生局局長高永文講嘅十‧一前後會為奶粉供應進行壓力測試，報道成下月就會撤消限奶令，仲話香港知錯能改云云，真係得啖笑。
其實限奶令今年三月生效後，內地人就覺得唔公平、被歧視、破壞香港自由市場招牌等等，日望夜望限奶令撤銷，而內地傳媒就配合吹風，無厘頭都會話限奶令快將玩完，包括出現「香港黃金周後或取消限奶令」、「香港或取消限奶令」、「知錯能改，善莫大焉」呢類標題。最慘呢啲標題嚇親香港媽媽，有人喺討論區話如果撤銷限奶令就會上街，又有媽媽擔心一個月大寶寶就快無奶粉食。
食衞局尋日重申，任何有關限奶令建議必須持久及經得起需求高峰期，例如十‧一黃金周及農曆新年前嘅考驗，睇字眼限奶令唔會咁快完。海關就話去年至本月中，已有近一千四百宗違反限奶令個案嘅涉案人士被定罪，唔想被罰，都係遵守法例啦。