颱風天兔吹襲本港，雖然無對香港造成嚴重破壞，但就搞到飛機航班大混亂，據聞至少有兩位外遊中嘅立法會議員因颱風而打亂行程，包括黃毓民同資訊科技界議員莫乃光。
黃毓民上星期同太太去台北過中秋，前日臨上機前先知道班機因為打風而取消，搞到佢要滯留台北。雖然尋日打風後航班逐步回復正常，但毓民又因為撲唔到機位而未能返港，惟有改搭今日早上嘅飛機趕返立法會開政府帳目委員會閉門會議。
莫乃光就幸運得多，皆因佢尋日身處日本京都時，都有擔心打風會令佢返唔到香港，但好彩天兔走得快，航班回復正常，佢先可以搭到原定班機返香港，仲比預定到達時間早咗成個鐘添。據講麥美娟同郭偉強都拉隊去咗台中玩幾日，到依家都未返，所以未受打風影響。至於部分無外遊嘅議員，一樣被天兔搞到手忙腳亂，陳恒鑌就話前日有兩個活動因打風而取消，另外一個宴會就提早舉行，搞到佢下晝四點半鐘就要食晚飯，之後又再食多咗餐。