政情：莫反口 小心甩大牙
唔少政府中人疑似意興闌珊，好似前勞工及福利局局長政治助理莫宜端（Zandra）同前政務司司長政治助理張秀麗先後辭職，雖然佢哋都話因為想照顧家庭，但唔少人都質疑佢哋係咪「跳船」。最巧合嘅係，話過辭職係因為想做個好媽媽嘅Zandra，尋日竟然獲批准出任一間學校嘅助理總監，下月履新。點解忽然間可以由全職媽媽變咗再就業嘅呢？
兼職學校助理總監
政府尋日就公布，前任行政長官及政治委任官員離職後工作諮詢委員會，已就Zandra出任兒童無限學校（九龍塘）助理總監（研究與發展）一職畀意見。委員會認為，喺Zandra遵循委員會意見嘅前提下，佢離開政府後擔任嘅新工作唔會損害或削弱政府履行職能嘅表現，唔會構成任何潛在利益衝突，亦唔會引致公眾產生負面觀感，令政府尷尬，所以批准佢出任新職。
對於Zandra辭職，唔少人都質疑Zandra係咪想「跳船」，離開政府呢個熱廚房。不過，當時Zandra就矢口否認，仲話辭職只係因為難以同時兼顧照顧仔女，而佢只想做個好媽媽，全心全意照顧仔女，暫時都唔會接受全職工作。當時特首為咗叫大家唔好揣測咁多，仲拋出一句︰「時間會證明一切」。點知Zandra上月廿四日離任後，至今事隔一個月，佢已經證明一切。
據了解，雖然Zandra喺兒童無限學校嘅職銜聽落好高級，但其實只係兼職，主要係負責家長教育同溝通方面嘅工作。
子女同喺該校就讀
加上Zandra嘅仔女都係喺呢間學校讀書，Zandra湊完仔女返學，就喺學校搵啲嘢做吓，咁佢就無論喺屋企定喺學校都可以全天候睇實對仔女啦！如果Zandra要超時工作，對仔女係咪陪佢一齊留堂呢？