中環出更：健步開餐 大劉欲言又止
捲入澳門巨貪案嘅華人置業主席劉鑾雄（大劉），上星期趁中秋佳節送大禮，一連兩日向傳媒「爆大鑊」，自爆有人陷害佢、屈佢，被人霸佔財產。中秋節假期完咗，強颱風「天兔」又走咗，大劉尋日中午冇再攜妻帶女食飯，只係自己同秘書去灣仔富豪飯堂食晏，但就唔肯再就為單巨貪案解畫喇，真係鍾意講就講，唔鍾意又唔講，唔知佢想點。
口震叫傳媒「等等等等」
尋日中午十二點鐘，有三個保安已經喺酒樓門外準備恭候大劉，三十五分鐘後大劉同秘書終於現身，我哋問大劉可唔可以就巨貪案官司傾幾句，雖然佢一落車耍手示意唔講嘢，但又口震震話：「你你你……等等等等」然後匆匆步入酒家，大劉秘書亦接過大家嘅卡片，再轉交畀保安。
大約一個鐘後，大劉終於食完飯，離開時亦留神好多，無再好似日前咁無啦啦跣腳。我哋再趁機問大劉可唔可以傾兩句，大劉呢個時候望望秘書，秘書搖搖手示意唔好，大劉就上咗座駕離開。大劉口都震晒咁叫大家「等等等等」，結果又係空等一場。