何謂富貴何謂窮？一般概念當然係決定於金錢多寡啦，有錢就叫做富貴，冇錢就叫做貧窮。之不過咁，有一種人好特別o架，佢哋錢唔係話冇，不過就「窮得只剩下錢」。經典人辦係台灣過氣總統陳水扁，由於佢干犯貪污腐敗罪，所以鋃鐺入獄至今都未服刑期滿，有牧師送咗本書畀佢獄中思過，書名就係《窮得只剩下錢》。
好嘞，特區政府話就話矢志扶貧，將一度執笠大吉嘅扶貧委員會起死回生，而且將於九月二十八日公布首次制訂嘅貧窮線，未來情況會係點呢？計功夫茶話齋，港產官僚千祈唔好學似阿扁一樣，坐擁萬億元計嘅儲備而窮得只剩下錢，否則就係一個與民為敵嘅孤寒財主！
扶貧委員會轄下社會創新及創業發展基金專責小組主席張仁良話喎，政府制訂貧窮線之後，日後制訂及推行新政策，對貧窮線以下人士嘅影響將會係重要考慮因素之一。張仁良仲話，認同最低工資委員會主席翟紹唐嘅講法，最低工資唔應該同貧窮線掛鈎，政府喺保障工人嘅同時，唔應該對行之有效嘅經濟制度造成過大影響。作為創新及創業發展基金專責小組主席，張仁良話會透過獎券基金撥款五億元成立基金，希望以創新手法動員商界人士協助扶貧及防貧工作，強調新措施唔會取代綜援制度等等福利措施。
講完一大輪，扶貧委員會到底點樣扶貧呢？唔好意思囉，十分抱歉囉，功夫茶睇唔出囉，淨係知道香港喺不久嘅將來會有一條貧窮線，至於如何令到窮等人家跨越呢一條線，一切仲係未知之數。
香港嘅窮等人家真係好慘o架，關注綜援低收入聯盟及天水圍社區發展陣線做過一項調查，受訪者主要係三至四人家庭公屋戶。調查發現，七成受訪家庭入息低於住戶收入中位數一半，七成六受訪家庭嘅總開支，佔總收入六成或以上，最大壓力嘅頭三項開支係子女學習費用（百分之六十七），膳食（百分之五十九），水電煤（百分之四十一）。調查團體認為，政府喺貧窮線之外，應該再以住戶入息中位數七成設立「防貧線」，盡快推行低收入家庭補貼。
唔知大家點睇，功夫茶就覺得只係訂立一條貧窮線係完全唔夠嘅，必須配合實際嘅扶貧工作，咁樣對窮人先至有意義。好似財政司司長曾俊華引起一場「誰是中產」嘅爭論，結果係點呢？咪得個吉囉，中產嘅生活擔子依然沉重，事關財爺冇相應措施改善中產嘅生活質素吖嘛。
總而言之一句講晒，扶貧難靠一條線，切勿窮得只剩錢！