政情：網上追風 黑英教路

強颱風天兔一連兩日正面吹襲香港，成為本港六十年來第二最強颱風。前天文台台長林超英（黑英）雖然不在其位，但佢仍然非常關心風暴情況，尋日仲喺社交網站教大家如何追蹤天兔。佢尋日下晝話，如果大家想了解天兔嘅路線圖，可以上內地中央氣象台網頁瀏覽汕頭雷達圖，又話最新影像顯示天兔風眼完整，叫市民唔好低估天兔對香港嘅威脅。當天兔遠離汕頭而接近香港一帶時，市民就應該改為上香港天文台網頁，睇吓天兔嘅強大勢力，佢仲提供埋兩條超連結添。