今年一月《施政報告》建議每個區議會各獲一億元撥款搞社區重點項目，有三個月時間提建議。但過咗大半年，十八個區得十一個向政府提出項目建議，負責審批嘅民政事務局局長曾德成疑似向未能提建議嘅區議會施壓，點名稱讚十一個區達成共識，話希望未達共識嘅區議會「發揮最大創意、凝聚力量」。
德成局長尋日佢喺網誌無點名批評邊個區議會未交功課，但佢就點名列晒交齊功課嘅十一個區議會，心水清嘅人數吓手指就知，未交功課係得南區、東區、荃灣、屯門、西貢、深水埗同觀塘，德成局長呢招「婉轉施壓」，認真犀利。
其實呢一億元重點社區項目，本應係上半年就要提交建議，但係有幾個區議會傾極都傾唔掂數，政府已經將提交限期延遲好多個月，由於延遲咗都無乜人理，曾德成呢個局長迫不得已先化身成學校老師，喺網誌催人交功課，睇嚟曾德成呢位老師要諗吓點樣「罰留堂」至得，否則呢七位學生點會唔聽話交功課囉。