政情：保釣兄弟踢楊匡落船
港產保釣船「啟豐二號」去年孤軍作戰下成功登上釣魚島，係十六年來首次再有華人登島，亦為本港保釣運動寫下歷史一頁。一年過去，保釣船有望十月啟航再即，去年負責開船、「一合埋眼就衝」嘅敢死船長楊匡作為成功登島嘅重要功臣，今次出海竟然冇佢份，保釣班兄弟更揚言以後都唔會預佢添！究竟發生咩事，搞到班兄弟玩內訌？
阿牛揶揄「買牌船長」
我哋就呢件內訌傳聞搵過保釣成員曾健成（阿牛），佢先係話同楊匡好耐冇聯絡，又以「買牌船長」揶揄楊匡，透露佢利用船長牌中港互通機制，先喺內地「買」船長牌，等三年再向海事處免試取得香港牌照，暗示楊匡根本唔識揸船。所謂楊匡喺緊急關頭親自駕駛，阿牛坦言當時身處駕駛室，佢向兩名正牌船長發號施令嗰陣，「楊匡根本唔喺駕駛室，最多出面頂吓水炮」喎。
阿牛又投訴，話兼負對外通訊重任嘅楊匡，登島一刻竟然掛住喺社交網站戶口「打卡」，而冇按保釣委員會指示喺官方網頁更新消息，直斥楊匡將消息「出口轉內銷」咁話。啟豐二號船東羅堪就亦批評，楊匡為達到個人野心而唔聽船上總指揮指示，重要時刻又冇留喺駕駛室，船上兄弟都非常不滿，直言「冇一個兄弟撐佢」，所以保釣已經安排三名成員喺香港正正經經考番個船長牌，以後唔使再靠楊匡喇。
楊強調自己盡職盡責
不過，楊匡強調自己盡職盡責，反駁船長唔一定要親自揸船，仲向我哋展示海事處發出嘅船長三級證明書，話事實可以證明一切。
據講保釣委員會過去出海都會安排三名船長坐鎮，但經驗豐富又願意為保釣負法律責任嘅外判船長難求，所以保釣就安排「自己友」楊匡返內地秘密練兵「考」船長牌，方便喺航程上負法律責任。所以楊匡去年面對日艦圍攻嗰陣係咪親自掌舵直搗釣魚島，兄弟間各說各話，但若果登島保釣呢項偉大事業，最終因為班兄弟不滿楊匡「打卡」搶風頭而引發內訌，甚至要夾手夾腳踢走佢，成件事真係好笑又兒戲囉。