中環出更：湯恩佳愛聽京曲 三月不知肉味
孔教學院院長、選舉委員會成員湯恩佳推動喺香港興建孔廟廿幾年，最近孔教學院建議喺鑽石山大磡村舊址起本港首間孔廟，獲黃大仙區議會支持，湯恩佳開心到不得了，盼望盡快同政府傾掂補地價等細節，四、五年後落成使用。
諗住退休後學拉京胡
孔子崇尚禮樂，鍾愛二胡嘅湯恩佳即將夥拍二胡大師王國潼及「二胡王子」王憓父子，喺十月上旬舉辦一場名為「三月不知肉味」嘅二胡音樂會。湯恩佳話，二胡係世界上最好聽嘅樂器，佢都好鍾意聽京曲，有時亦玩票性質唱兩句，佢形容，有時聽得太投入，嗰種餘音繞樑嘅感覺，真係似足孔子當年聽到齊國韶樂，三個月唔知肉味嘅境界。王憓就建議話，等孔廟落成後，佢可以間中到孔廟演奏，湯恩佳聽完都讚好，仲話諗住退休後學拉京胡添！
湯恩佳笑稱對孔教嘅任務仍未完成，要繼續要求政府將九月廿八日孔誕日列為公眾假期，仲有將教師節由九月十日改去九月廿八日。
卓妮