「樓上舖」愈來愈時興，樓上食肆、樓上時裝店、樓上海味舖，大家見得多嘞，樓上麻雀賭城聽過未？而且仲係開喺工廠大廈添，問你服未！
呢，香港仔有幢廿五層高嘅工廈，由五樓到廿四樓幾乎層層都有提供麻雀耍樂嘅地下賭檔，電動麻雀枱、籌碼一應俱全，連「睇場」都有埋，論規模叫「麻雀賭城」一啲冇誇張。有啲私竇喬裝成空置單位，或者掛起「聯誼會」招牌掩人耳目；有啲更需要熟人介紹至可以入內搏殺，保安水準好專業o架。
私竇內部格局同麻雀館有得揮，設備齊全，人丁興旺，賭客賭到不亦樂乎，每張賭枱會以「抽水」或者入場費形式收取費用。講到注碼，由五十蚊一底到上落過萬都有，悉隨尊便。據本報記者現場觀察所得，成幢工廈加埋有成百張賭枱，可以同時招呼四百名賭徒，規模拍得住「梳打埠」中型賭場o架。
麻雀私竇開到成行成市，唔止令工廈其他用戶飽受聲浪困擾，擔心治安變差，更令部分市民沉迷賭博，不可自拔，有人甚至賭到傾家蕩產添吖。有附近街坊承認，曾經係私竇嘅熟客，經常放咗工就上去「開枱」，最終連自住物業都輸埋，講起都幾可悲。
工廠大廈變賭場，呢啲奇景可以話係港府嘅「政績」之一。本港製造業日漸式微，工廠大廈十室九空，港府好耐之前已提出活化工廈，聲稱要地盡其用，增加房屋供應喎。可惜港產官僚眼高手低，結果弄巧反拙，活化變咗唔化甚至死化。
嗱，自從當局推出活化政策之後，工廠大廈變咗搶手貨，跆拳道場、 舞蹈學校、賓館酒店、傳道教會、野戰遊戲場，各適其適，甚至連骨灰龕都差啲堂而皇之進駐工廈，可以講係五花八門，無奇不有，得個亂字。
仲有吖，由於前朝政府房屋政策失敗，樓價飆升，租金上漲，無殼蝸牛無處棲身，工廈淪為劏房重災區，搞到消防隱患處處，危機四伏。當局舊年提出將工廈改裝成「過渡性住房」，希望短時間內增加小型單位供應，解決劏房問題。點知之後又話計劃唔可行喎，過渡性住房成為無米粥，基層市民只能繼續望天打卦。
呢頭懶理通街無殼蝸牛，嗰頭任由工廈變麻雀賭城，政府嘅房屋政策直頭亂過亂世佳人。咪話功夫茶唔提醒，如果當局繼續吹水唔抹嘴，活化政策添煩添亂，工廈遲早變都市炸彈嘅咋。