政情：熨斗大王：揸飛機易過揸車
近期電視劇《衝上雲霄II》令好多人都去學揸飛機，好似「熨斗大王」東寶集團主席陳鑑光（Charles）就係其中之一。Charles日前同身兼仁愛堂主席嘅太太陳鄭玉而（Connie）一齊出席活動時話，嚟緊將赴加拿大進行一個月飛行特訓，有信心月內成為「Captain Chan」。
冀帶學生上雲霄
Charles月前已到過加拿大Waterloo機場學習駕駛定翼機，學滿四十小時即考獲牌照。佢想學做飛機師嘅緣由，始於兩年前加入香港航空青年團，話說青年團逢周末會帶學生飛上天俯瞰香港，藉此加深佢哋嘅地理知識。當時佢忽發奇想，希望有日買架私人飛機，親自帶學生衝上雲霄。做得飛機師，首先要唔怕暈浪，Charles好有信心話，遇到氣流都唔使食暈浪丸喎。
Charles笑言，初初以為揸飛機好難，原來仲易過揸車，唯一要注意係起飛前嘅檢查絕不能馬虎。唔知佢考到飛機牌照之後，第一個乘客會唔會係太太Connie呢？