政情：黃家和法酒莊 葡萄成熟時
四個月前喺法國波爾多買咗個古堡酒莊嘅餐飲聯業協會會長黃家和（Simon），日前又飛去酒莊探班，此行係監督古堡裝修工程，並與波爾多葡萄學校及隔籬嘅Bergerac Maison des Vins葡萄酒推廣處洽談合作計劃，合作開辦專業葡萄酒課程。
試酒室嘗數十款佳釀
Simon去到Bergerac Maison des Vins，最大開眼界嘅莫過於參觀試酒室，內有多個巨型酒桶，枱上放滿一支支盛滿佳釀嘅試酒管。一場嚟到，Simon試勻數十款美酒。佢笑言平時食嘢接觸唔少香料、醬料，但好少細心關注每一種味道嘅特點，今次認真試酒味，差啲被考起。
Simon早前喺酒莊種落葡萄Merlot，眨吓眼，啲葡萄已長得每粒都又大又肥美，果味香濃，但仍要等到下月初先啱時間採摘。雖然佢個莊園坐落喺波爾多旁邊，但屬於Bergerac土壤。Bergerac係個中世紀古城，亦係法國出名嘅葡萄酒區。Simon就打算將酒莊打造成旅遊景點，吸引港人去試酒同影婚紗相。