中環出更:立會禁單車泊過夜 玩謝高佬賢

立法會為咗推廣綠色生活,喺新大樓特設單車泊位,畀議員、職員同其他出席會議人士使用,但原來有關單車泊位唔可以泊過夜,搞到早前帶咗架單車返去,準備用嚟往來立法會同港內線碼頭嘅漁農界議員何俊賢(高佬賢),最後成架抬上樓上嘅議員辦事處存放。

新一屆立法會上任無耐,民主黨議員胡志偉曾經試過踩單車返立會大樓,豪言自己會每朝由屋企踩去港鐵站,然後再放低架單車搭地鐵返工,不過據聞佢之後並無堅持呢個習慣。高佬賢近日亦帶咗架私家單車返立會,不過佢就表明咁做唔係為咗環保,而係純粹自己懶,想行少兩步啫。

往返碼頭更方便

高佬賢有唔少漁農界選民住喺離島,不時要往返立法會同中環港內線碼頭,大熱天時行起上嚟都咪話唔辛苦,但又無理由由金鐘搭一個站地鐵去中環再行過,於是佢決定放定架單喺立會,以便有需要時踩過去碼頭坐船。不過當佢帶咗部單車返去之後,先發現原來立會嘅單車泊位唔可以泊過夜,如果改泊入停車場車位,本身已經有部車嘅佢又擔心會被指「double parking」,一個議員違規泊兩個車位,惟有將部單車抬上辦事處,最後又係搞到成身汗。

卓妮

第一手消息請下載on.cc東方互動iPhone/iPad/Android/Windows Phone Apps