中環出更：梁愛詩逛超市 與店員雞啄唔斷
基本法委員會副主任梁愛詩外表嚴肅，但其實佢好親民，尤其係見到美食同講烹飪心得嘅時候。日前卓妮見到梁愛詩喺午膳時候現身金鐘一間超市，佢喺不同貨架之間來回穿梭，盡情選購心水食品，期間仲主動同一名女售貨員搭訕，二人傾到雞啄唔斷，笑得不知幾開心！
當日下午一點鐘左右，梁愛詩單拖走入金鐘太古廣場地庫一間超市，佢一身黑色衫、裙及鞋，挽住黑色手袋嘅裝束，同一頭招牌白色鬈髮形成強烈對比，喺人群之中好突出。詩姐冇用購物籃，徒手拎住一包疑似風乾火腿嘅紙包食品、一樽蛋黃醬、一包香腸，仲有一袋三文治方包，莫非佢想炮製腸仔火腿三文治畀自己歎？
正當梁愛詩兩手捧住食物，想行去付款處排隊畀錢之際，佢忽然畀一個售賣蝦子麵嘅專櫃吸引住，隨即上前看個究竟。女售貨員見狀即笑容滿面咁招呼佢，細心咁向佢介紹麵食。只見詩姐表現親民，不時咧嘴而笑，又同女售貨員肩並肩咬耳仔，手指指咁閱讀食品旁邊嘅紙牌，唔通係講緊點樣煮蝦子麵先好食？不過佢最後都係冇幫襯，睇嚟佢鍾意食方包多啲喎。
買嘢食冇帶環保袋
離開專櫃後，梁愛詩迅即收起燦爛笑容，好守規矩咁默默排隊付款。由於佢個手袋太細，自己又無帶環保袋，付款時惟有加錢買咗個超市膠袋盛載食品。詩姐向來處事細心，估計佢當初嚟購物時，都無諗過自己最後會買咁多嘢，所以先無自備環保袋。
卓妮