曾幾何時，香港被稱為亞洲足球王國，可惜輝煌歲月一去不返，今時今日嘅香港連一個大球場都搞唔掂，講起真係丟架。呢，因為大爛地而臭名遠揚嘅大球場，封閉復修兩個月後，今日終於重開喇，仲會上演本年度首場甲組足球賽事添，大家估吓草地會唔會又變成泥地吖嗱？
咪話功夫茶杞人憂天，大球場再變大爛地，真係分分鐘會噩夢重演o架。大家都知，大球場嘅復修工作原定到明年，不過康文署話喎，因為草地情況良好，所以提前解封進行比賽；仲話為縮短復修時間，已經將球場範圍外嘅草皮移植到草地中央受損部分，而球場損耗較少部分亦已經加強修剪、施肥及釘地鬆土喎。講就講得頭頭是道嘞，事實究竟係咪咁樣，落場先至見真軍！
嗱，本報記者尋日視察過大球場，真實情況同港產官僚所講嘅有好大出入，包括多處位置依舊光禿禿，龍門範圍草枯見黃，甚至驚現一個個泥洞，而場邊亦有未清理嘅爛草，咁都算情況良好？好話唔好聽，大球場遍體鱗傷，又爛又瘀，就算勉強重開，都隨時出事嘅咋。
更令人擔心嘅係，大球場飽受傷患困擾，外傷未愈都係其次，內傷惡化先至攞命吖。係人都知，大球場當年設計出錯，排水系統廢晒武功，所以一落大雨就變水塘，球員馳騁綠茵好似打水上足球。家陣大球場只係更換草皮，冇改善排水系統，即係換湯不換藥，治標唔治本，如果天公作美風和日麗，或者冇問題嘅，萬一風雲變色落大雨，容乜易又變大爛地o架？容乜易又成國際笑話o架？當局復修大球場急功近利，鼠目寸光，如果又鬧出「殺人球場」嘅港式體壇醜聞，港產官僚等住集體降班啦！
所以話，有乜嘢政府就有乜嘢官僚，大球場千瘡百孔，其實就係港府嘅一個縮影。點解咁多年施政都一塌糊塗呀？原因就係港府由裏到外層層爛透，已經變成結構性問題。北大人幾年前已經警告港產官僚，香港存在深層次矛盾，要盡快諗辦法解決。點知港產官僚左耳入，右耳出，到依家深層次矛盾唔只未解決，反而不斷惡化添。嗱，政治爭拗無日無之，貧富懸殊不斷惡化，社會撕裂愈演愈烈，如果唔進行一次翻天覆地嘅大工程，香港遲早好似大球場咁，修無可修，救無可救。
一句講晒，大球場帶病重開，爛政府復修無期。既然大球場扶傷上陣，大家惟有求神拜佛，希望香港無風無雨啦，如果唔係，隨時又搞出大爛地鬧劇，咁就醜上加醜喇！