環境局早前強推擴建三個垃圾堆填區，但又鮮有派出話到事嘅官員落區解釋同聽民意，結果辣慶受影響嘅西貢、屯門、元朗同北區區議會，最後要由人稱「眾人奶媽」嘅政務司司長林鄭月娥披甲落區，幫手收拾殘局。不過，環境局局長黃錦星未有吸取教訓，據聞近期連向來同該局無乜瓜葛嘅觀塘區議會都辣慶埋，三催四請都拒絕派員去開會，真係夠晒大牌。
話說今年七月有報道話香港收咗大批外國「洋垃圾」同「廢膠」，咁啱觀塘區內有唔少廢物回收業，觀塘區議會轄下嘅環境及衞生委員會就提議邀請相關業界代表同環境局官員出席會議討論有關問題，但被環境局以事忙為由婉拒。班區議員諗當時立法會正激辯緊擴建堆填區問題，環境局官員分唔到身都可以理解，於是就等放埋暑假先再傾。
不過，事隔兩個月，環境局依然無聲氣話幾時派人去開會，於是有議員就鬧到上區議會大會討論，最後以大比數通過要環境局立即「交人」，但局方答覆依舊係有其他公務安排，未能派代表出席會議，令區議員勁慶。究竟環境局為何搞足兩個幾月都派唔到一位官員去開會？全港十八個區議會有五個都得罪咗，仲邊有區議員支持該局政策呢？