政情:官司纏身大劉呻到葉落

被澳門檢察院起訴賄賂及清洗黑錢嘅華人置業主席劉鑾雄(大劉),喺案件審訊進入尾段時一反常態有異動,似有絕地反撲之勢。話說,大劉繼早前更換律師團隊後,尋日又突然玩小圈子舉行細圍記者會,一時話官司纏身係遭人陷害,一時又話自己嘅處境好似內地清末電視劇,畀人用「莫須有」罪名捉咗。佢突然長氣呻到樹葉都落,成件事認真耐人尋味。

拍《張子強與大劉》

大劉自從官司纏身後都一直三緘其口,但尋日佢竟然罕有地會見幾間傳媒談論其案件。據聞大劉一開口就話自己病重,但對官司纏身忿忿不平,一再聲稱自己遭人陷害,係有人「屈」佢。其後佢又聲稱,案件發生後多次有人向佢提出購買佢持有涉案地皮公司,自言如果佢肯答應可擺平案件。

大劉話依家處境,就好似內地電視劇《將軍》嘅劇情一樣,畀人霸佔財產。仲話有人要投資,將佢嘅經歷拍一套電影叫《張子強與大劉》,大劉誓神劈願咁話並無牽涉洗黑錢嘅勾當,仲話「諗過都絕子絕孫」。

大劉一係唔呻,一係就呻唔停,大爆日前撤換出庭為佢辯護嘅梁永本和李金月澳門律師團隊嘅原因,自稱澳門律師當初係別人介紹,撤換律師係為勢所逼,反指律師沒有盡力為佢辯護喎。

審訊尾段忽然高調

話時話,大劉喺案件審訊進入尾段先議事論事,畀人覺得係唔係要盡地一煲絕地反撲,究竟大劉突然呻到樹葉都落係咪有乜特別訊息,相信更加耐人尋味嘅內容到真相大白之日,就可以一一「解密」。

第一手消息請下載on.cc東方互動iPhone/iPad/Android/Windows Phone Apps